13-cü fəsil

1-13

XƏBƏRDARLIQ, ARZU, ÜMİD VƏ XEYİR-DUA (2Korinflilərə 13)

Paulun sərt məktubunu yekunlaşdıran bu fəsil aşağıdakı vacib məqamlarla xarakterizə olunur.

1) Paul xəbərdarlıqla bitirir. O, yenidən Korinfə gəlmək niyyətindədir və xəbərdarlıq edir ki, bu dəfə əxlaqsız söhbətlərə və düşünülmədən deyilən sözlərə dözməyəcək. Deyilənlərin hamısının şahidi olmalı və yoxlanılmalıdır. Müasir dillə desək, Paul açıq oynamağa çalışıb. Mövcud xoşagəlməz vəziyyətin davam etməsinə icazə vermək olmaz. O, yaxşı başa düşürdü ki, bir gün bütün xoşagəlməz vəziyyətləri aradan qaldırmalı olacaq.

2) O, xoş arzu ilə bitirir. O, yaxşı işlər görmək istəyirdi. Onda Paul heç vaxt öz həvari səlahiyyətindən istifadə etməli olmayacaq. Bu onun üçün məyusluq olmayacaq, əksinə, ona dərin sevinc bəxş edəcək. Paul heç vaxt özünü təsdiq etmək üçün səlahiyyətini nümayiş etdirməyə çalışmırdı. Onun bütün fəaliyyəti məhvə yox, yaratmağa yönəlmişdi. İstənilən cəza insanı alçaltmağa yox, yüksəltməyə xidmət etməlidir.

3) O, ümidlə bitirir. Onun ümidi üçqat idi. O, korinflilərdən gözləyirdi ki...

a) onlar təkmilləşməyə davam edəcəklər. Məsihçi heç vaxt çatdığı mövqe ilə kifayətlənməməlidir. İrəli getməyən geri çəkilir. Məsihçi mütəmadi olaraq Allaha doğru hərəkət edir. Buna görə də Məsihin lütfü ilə sınanmaq, Allahın hökmünə hazır olmaq üçün hər gün təkmilləşməlidir.

b) Paul ümid edir ki, korinflilər onun çağırışına qulaq asacaqlar. Yalnız güclü insan yaxşı məsləhətlərə əməl edə bilər. Əgər biz istədiklərimiz barədə az düşünsək, müdriklərin və hər şeydən əvvəl İsa Məsihin səsinə daha çox qulaq assaq, qabağa gedərik.

c) Paul korinflilərin sülh və harmoniya içində yaşayacaqlarına ümid edirdi. Heç bir imanlı cəmiyyəti zəhərlənmiş atmosferdə sülh qaynağı olan Allaha xidmət edə bilməz. Yalnız Allahı sidq ürəkdən sevən adam insanları sevə bilər.

4) Sonda Paul korinflilərə xeyir-dua verir. Ciddilik, mübarizə və mübahisə xeyir-dua ilə əvəz olunur. Düşmənlərlə barışmağın ən yaxşı yolu — onlar üçün dua etməkdir. Çünki bir insana nifrət etmək və eyni zamanda onun üçün dua etmək mümkün deyil. Paul ilə korinflilər arasındakı münasibətlərin çətin hekayəsi xeyir-dua sədaları altında yekunlaşır. Çətin iş başa çatır, son söz isə sülh sözü olaraq qalır.